सुर्खेत: नेपाली कांग्रेसका सभापति गगनकुमार थापाले कर्णाली प्रदेश सरकारको नेतृत्व अब कांग्रेसले गर्नुपर्ने बताएका छन्। सोमबारदेखि सुरु भएको प्रदेशस्तरीय भेलालाई सम्बोधन गर्दै थापाले तत्कालीन अवस्थामा कांग्रेस–एमालेबिच भएको गठबन्धनको सहमति अनुसार कर्णालीमा अब कांग्रेसले सरकारको नेतृत्व गर्नुपर्ने बताए।
यहाँ ०८१ साउनदेखि कांग्रेसको समर्थनमा नेकपा एमाले संसदीय दलका नेता यामलाल कँडेल मुख्यमन्त्री छन्। ‘अब हामीले नेतृत्व गर्ने बेला आएको छ,’ थापाले भने।
कांग्रेस प्रदेश कमिटीले पनि यसअघि नै सरकारको नेतृत्व लिनुपर्ने निर्णय गरिसकेको छ । तर संसदीय दलका नेता जीवनबहादुर शाहीले त्यसबारे खासै अग्रसरता देखाएका छैनन्। कर्णाली प्रदेश सभामा नेपाली कांग्रेस, नपाल कम्युनिस्ट पार्टी (नेकपा), नेकपा एमाले र राष्ट्रिय प्रजातन्त्र पार्टी गरि चार दलको उपस्थिति रहेको छ ।
प्रत्यक्षतर्फ २४ र समानुपातिकतर्फ १६ सहित ४० सांसद रहेकाे कर्णाली प्रदेश सभामा नेपाली कांग्रेस ठुलो दल छ । कांग्रेससँग १५ सिट, नेपाली कम्युनिस्ट पार्टी (नेकपा)सँग १४ । र एमालेसँग १० सिट र राप्रपासँग १ सिट छ । यहाँ बहुमतका लागि २१ सिठकाे आवश्यकता पर्छ । जसका लागि कांग्रेसले नकपा वा एमालेसँग मिलेर सरकार बनाउन सक्छ ।
नेपाली कांग्रेसले सुर्खेतको वीरेन्द्रनगरमा साेमबार र मंगलबार कर्णाली प्रदेशस्तरीय भेला भइरहेकाे छ ।
विशेष महाधिवेशनपछि वैशाख २८ र २९ गते प्रदेश तथा स्थानीयतह केन्द्रित भेला गरेकाे हाे । भेलामा कांग्रेस सभापति गगनकुमार थापा उपसभापति विश्वप्रकाश शर्मा महामन्त्री प्रदीप पौडेल लगायतका शीर्ष नेताहरूले सम्बोधन गरेका छन् । कांग्रेसको केन्द्रीय नीति, अनुसन्धान तथा प्रशिक्षण प्रतिष्ठानको आयोजनामा प्रदेशस्तरीय भेलाको आयोजना गरिएको हो।
पार्टीका शीर्ष नेताहरूको सहभागितामा आयोजना गरिएको भेला आगामी राजनीतिक कार्यदिशा, निर्वाचन समीक्षा तथा सुशासनका सवालमा केन्द्रित रहने जनाइएको छ। भेलामा कर्णाली प्रदेशबाट पार्टीको केन्द्रीय कार्यसमितिमा प्रतिनिधित्व गर्ने सम्पूर्ण केन्द्रीय सदस्य, प्रदेश कार्यसमितिका पदाधिकारी, १० वटै जिल्लाका सभापति, प्रतिनिधिसभा सदस्य, प्रदेश सरकारका मन्त्री, प्रदेशसभा सदस्य, स्थानीय तहका प्रमुख–उपप्रमुख तथा गाउँपालिका अध्यक्ष–उपाध्यक्षहरूको सहभागिता रहेकाे छ।
प्रतिष्ठानका सदस्य प्रकाश लामिछानेले भेलामा हालै सम्पन्न प्रतिनिधिसभा निर्वाचनको वस्तुनिष्ठ समीक्षा, संगठनात्मक कमजोरीको पहिचान तथा पार्टीभित्रको अनुशासन र आन्तरिक एकतालाई सुदृढ बनाउने उद्देश्यमा केन्द्रित हुने बताए। भेलामा प्रदेश तथा स्थानीय तहका सरकारले अपनाउनुपर्ने नीति, कार्यक्रम र जनमुखी विकास मोडेलबारे विस्तृत छलफल हुने उनको भनाई छ।
बदलिँदो जनमत र मतदाताको मनोविज्ञानलाई ध्यानमा राख्दै पार्टीको भावी नीतिगत परिमार्जन, संगठन शुद्धीकरण तथा जनप्रतिनिधि र नेतृत्वबीच साझा धारणा निर्माणमा पनि विशेष जोड दिइनेछ। त्यसैगरी सुशासन, भौतिक पूर्वाधार विकास, सामाजिक रूपान्तरण, विपद् व्यवस्थापन तथा बजेट व्यवस्थापनका प्राथमिकताबारे स्पष्ट कार्ययोजना तय गरिने बताइएको छ।
नागरिकमैत्री बजेट निर्माण, समावेशी विकास र पार्टी तथा जनप्रतिनिधिबीच प्रभावकारी समन्वयका विषयमा समेत गहन छलफल हुने आयोजकले जनाएको छ। दुई दिने छलफलपछि ‘सुर्खेत घोषणापत्र’ जारी गर्दै कर्णालीको विकास, समृद्धि र सुशासनबारे पार्टीको आधिकारिक धारणा सार्वजनिक गरिने तयारी गरिने छ। कांग्रेसले भेलालाई कर्णाली केन्द्रित राजनीतिक, संगठनात्मक तथा विकास रणनीति निर्माणको महत्वपूर्ण अवसरका रूपमा लिएको बताइएको छ।
खुलानजर । २९ बैशाख २०८३, मंगलवार ०९:१५