सुर्खेत: सुर्खेतका दिवंगत गायक याम सिंह विकले करिब एक दशकअघि देखेको एउटा सांगीतिक सपना अन्ततः पूरा भएको छ। विकले करिब १० वर्षअघि रेकर्ड गरेको नेपाली प्रेमगीत ‘बतासे पानी’ अहिले म्युजिक भिडियोसहित दर्शक तथा श्रोतामाझ आएको हो।
गीत रेकर्ड गरेपछि त्यसको म्युजिक भिडियो निर्माण गरेर दर्शकमाझ ल्याउने याम सिंह विकको सपना थियो। तर, भिडियो निर्माण गर्न नपाउँदै उनको निधन भएपछि उक्त सपना अधुरै रह्यो।
समय बित्दै गए पनि उनले छाडेर गएको गीत भने जीवित रह्यो। यही अधुरो सपनालाई पूरा गर्ने प्रयास गरेका छन् सुर्खेतका चर्चित मोडल रेशम नेप्किङले।
याम सिंह विकको ‘बतासे पानी’ गीतबारे जानकारी पाएपछि रेशमले उक्त गीतको म्युजिक भिडियो निर्माण गर्ने योजना बनाएका थिए। त्यसपछि उनले आफ्नै व्यक्तिगत लगानीमा काठमाडौंबाट गीतको म्युजिक भिडियो निर्माण गरेका हुन्।
नेपालका चर्चित निर्देशक विक्रम चौहानको निर्देशनमा तयार भएको भिडियोमा रेशम नेप्किङ र करुना तामाङले अभिनय गरेका छन्।
करिब एक दशकअघि रेकर्ड गरिएको गीतलाई नयाँ पुस्तामाझ पुर्याउने र दिवंगत गायक याम सिंह विकको अधुरो सपना पूरा गर्ने उद्देश्यले निर्माण गरिएको यो भिडियोले सुर्खेतमा चर्चा पाएको छ।
याम सिंह विक आज हामीमाझ नरहे पनि उनको आवाज र सिर्जना भने ‘बतासे पानी’ मार्फत फेरि दर्शक तथा श्रोतामाझ आएको छ। उनको सांगीतिक सिर्जनालाई नयाँ पुस्तासम्म पुर्याउने यो प्रयासलाई धेरैले कलाकारप्रतिको सम्मानसँगै मानवीय संवेदनाको उदाहरणका रूपमा लिएका छन्।
रेशम नेप्किङको यो कदमले कुनै कलाकारले देखेको सपना उसको अनुपस्थितिमा पनि पूरा गर्न सकिन्छ भन्ने सकारात्मक सन्देश दिएको छ। वर्षौंअघि अधुरो रहेको एउटा सपना आज गीत र संगीतमार्फत फेरि जीवित भएको छ।
प्रज्वल चुनारा । ३ भाद्र २०८३, बुधबार २२:०७