सुर्खेत: श्रीमानको हत्यामा संलग्नलाई कारबाहीको माग राख्दै उच्च अदालत सुर्खेतमा धर्नामा बसेकी जनिचाँदे गाउँपालिका–६ जाजरकोटकी ३४ निर्मला शाही, उनका नाबाल छोरा र २५ वर्षीय बहिनी सरा शाहीलाई प्रहरीले बिहीबार नियन्त्रणमा लियाे । ०८१ माघ १७ गते उनका ४२ वर्षीय पति रामबहादुर शाहीको गाउँमै हत्या गरिएको थियो । शाही माघ १७ गते जुनिचाँदे गाउँपालिका–५ स्थित शिवपुरी माध्यामिक विद्यालयमा भइरहेको राष्ट्रपती रनिङ शिल्ड प्रतियोगिता हेर्न गएका थिए । खेलकुद कार्यक्रम हेरेर फर्किने क्रममा काहाँरे खोलामा उनी मृत अवस्थामा भेटिएका थिए । इलाका प्रहरी कार्यालय गर्खाकोटबाट प्रहरी नायब निरीक्षक पूर्णबहादुर रानाको टोली घटनास्थल पुगेर घटनाको अनुसन्धान अगाडी बढाएको थियो । घटनास्थल थप शंकास्पद देखिएपछि जिल्ला प्रहरी कार्यालय जाजरकोटबाट प्रहरी निरीक्षक दिनेश तिमिल्सिनाको कमान्डमा थप टोली खटिएको थियो । घटनास्थलमा रगतजस्तो देखिने रातो पदार्थ भेटिएको र उनको टाउको र कानमा चोट देखिएको प्रहरीको प्रारम्भीक अनुसन्धानले देखाएके थियो । हत्यामा संलग्न भएको आरोपमा एक १५ वर्षीय बालकसहित नौं जना विरुद्ध पीडित पक्षले कर्तव्य ज्यानको मुद्दा दर्ता गरेका थिए । ०८१ फागुन १३ गते जिल्ला अदालत जाजरकोटको आदेशले रेशमबहादुर शाही र रामबहादुर शाहीलाई दुई लाख ५० हजारका दरले, अर्की आरोपित मैसरा शाहीलाई एक लाख धरौटीमा छोड्ने आदेश दियो । आरोपित रामबहादुर शाही र ६५ वर्षीया तुला कुमारी शाहीलाई साधार तारेखमा छोड्ने अदालतले आदेश दिएको थियो । त्यस्तै १५ वर्षीय बालकलाई अभिभावकको जिम्मा लगाइएको थियो । अन्य तीन जना प्रेमबहादुर शाही, बिरबहादुर शाही र जयबहादुर शाहीलाई अदालतले पुर्पक्षका लागि कारागार पठाउने आदेश गरेको थियो । जाजरकोट अदालतको आदेश विरुद्ध उच्च सरकारी वकिलको कार्यालय सुर्खेतले ०८१ चैत ३ गते उच्च अदालत सुर्खेतमा (७३ नम्बरको) मुद्धा दर्ता गरिएको थियो । यहि ४ गते उच्च अदालत सुर्खेतले जाजरकोट जिल्ला अदालतसँग कैफियत प्रतिवेदन मागेको थियो । बिहीबार ( आज) उच्च अदालत सुर्खेतले घटनाका विपक्षीलाई जानकारी दिने आदेश जारी गरेको उच्च अदालत सुर्खेतका उपरजिष्ट्रार प्रेमप्रकाश थापाले जानकारी दिए । ‘सरकारी पक्षबाट निवेदन आएपछि हामीले जिल्ला अदालतसँग कैफियत प्रतिवेदन माग गरेका थियौं । सोही बमोजिम आजको इजलासले प्रतिवादीलाई जानकारी दिने आदेश दिएको छ,’ उनले भने । हत्यामा संलग्न भएका व्यक्तिहरुलाई धछोडिएको भन्दै उनीहरुलाई कारवाहीको माग गर्दै मृतककी श्रीमती निर्मला शाही नाबलक छोरासहित विभिन्न आठ बँुदे माग राख्द चैत १९ गतेदेखि उच्च अदालत सुर्खेतमा धर्नामा बसेकी थिइन् । उनीसँगै निर्मलाकी बहिनी २५ वर्षीया सरा शाही पनि धर्नामै थिइन् । धर्नामै बसिरहेका बेला शरिरमा पेट्रोल छर्कन लागेको भन्ने सुचना पाएपछि क्षतिबाट बचाउन नियन्त्रणमा लिइएको जिल्ला प्रहरी कार्यालय सुर्खेतका प्रहरी निरीक्षक अजय डाँगीले बताए । ‘अदालत अगाडी धर्ना बसिरहेका बेला शरिरमा पेट्रोल छर्किरहेको भन्ने सुचना पाएपछि क्षति हुनबाट बचाउन हामीले नियन्त्रणमा लिएका हौं,’उनले भने, ‘दुई घण्टासम्म सम्झाई बुझाई गरेर छोडेका छौं ।’
जगतदल । २० चैत्र २०८१, बिहीबार २१:३३